1
Христос воскресє, Живот нам даруєт
И лучше єще дати обЂцуєт.
Христос воскресє и не умрет к тому,
Но всегда будет жити в нашем дому,
Благая вносить вся в дом наш з собою,
Діавол мусить уступит[ь] зъ злобою.
ТЂштеся ж с того, же Христос въ вЂки
Царствовать будет в небЂ з человЂки.
По долгом вЂку зычу царствовати
И вам: в Царст†Христа оглядати.

2
«По трєх днєх встану!» — яко рек Спаситель,
Днесь [ь] зистил слово своє Откупитель.
Архієреє лестцем єго звали,
Да се исполнить, вЂры не давали.
Слово, Сын Божій, додержал им слова,
А их лживая завстыдила мова.
Небо и земля мимо ити може,
А что Ты рекнеш, то стат[ь] имать, Боже.
И вставши, яко рекл: «Мир вам!» — так буде,
А вы ся с того мира тЂште, люде.
В мірЂ мира долго заживайте,
В НебЂ, вЂнаго от Христа чекайте.

3
Живот въ ГробЂ не могл долго быти,
Пошол умерлых з Гробу воскресити.
И Гроба Живот жити научаєт,
Живот умрЂти и в ГробЂ не знаєт.
Научил Живот умерлых ожити,
Добре умерлым Живот в ГробЂ мЂти.
Кгды бы въ ГробЂ Живот ся не бавил,
Лежачих въ ГробЂ живо б не поставил.
Да сей Живот въ вас житіє усладить
И о всем благом, яко благ, нам радит.
«Аз съ вами буду до скончаніа вЂка!» —
ОбЂцал то нам Небесный Владыка.
Да всегда з вами Христос пребываєт,
А, яко благій, всЂх благ подаваєт!

4
Воскрес из гроба Христос, Цар наш міра,
Сицева наша восточная вЂра.
Яко Іона три дни был въ китЂ,
Кит не можаше єго поглотити.
Іона-Христос три дни был въ гробЂ,
И сам ад блага Христа не озлобЂ.
Не могл полкнути гроб Владыку гроба,
Возврати Христа адова утроба.
З лихвою єще нужно возвратити,
Мертвым дадеся на Христа смотрЂти.
Мертвыми Христос в гробах обладаєт,
Полныи костми гробы испражняєт.
З Господем живым и рабы восташа,
Луча въ свЂту свЂт им показаша,
И вы съ Христом повстанте от гроба,
Да никакова не мучить хороба.
Здраво и долго на свЂтЂ живЂте,
Воскресша Христа, Живота держЂте!
З тым же Животом и в НебЂ вам жити,
Треба вам єго грЂхом не гнЂвити.
Аще кто грЂшить, паки умираєт,
И сего Христос благій въскрешаєт.
Воскресшій Христос да живет съ вами,
Исполняя вас многими дарами!

5
Рыдал мір зъ смерти умерша Владыки,
НынЂ ся тЂшить з аггелскими лики.
Єгда въ гробЂ Спаситель лежаше,
«Востани слава!» — Церков вопіяше.
На сей глас Церквє днесь воста от гроба,
Да тебЂ, Мати, не горить утроба.
Красуйся нынЂ, КраснЂйшаго Мати,
Минуло время уже ти ридати!
Повстал от гроба, Бозскую моць зъявил,
Отець въ адЂ Сына не оставил.
«Сниди съ креста, аще єсь Сын Божій!» —
Остріє слова ставили, як ножы.
Знятый съ креста сам воста от гроба,
Твоя окраса и твоя оздоба.
Съ Пречистою всЂ ся веселЂмо!
Як рекл «Востану!», то не пошло мимо.
Да сія радость наше сердце тЂшить,
Господь пасет нас и ничтоже лишить,
По долгом вЂку пасти будет в НебЂ,
Там нашой вЂчне выгодит потребЂ.